Avviżi – 7 ta’ Novembru 2021

Il-Ħadd, 7 ta’ Novembru 2021, fl-4.00pm issir quddiesa fiċ-ċimiterju. F’każ ta’ maltemp il-quddiesa ssir fil-Knisja ta’ San Pawl il-Baħar. Fil-parroċċa tagħna l-quddies ikun fil-ħin tas-soltu.

Matul ix-xahar ta’ Novembru il-quddiesa tal-Ġimgħa filgħaxija tkun b’suffraġju għall-mejtin li tistgħu tħallu isimhom fuq il-formola li ssibu ħdejn il-bieb tal-Knisja.

Mis-7 ta’ Novembru reġa’ beda jkun stampat il-fuljett Jum il-Mulej. Tistgħu tieħdu kopja minn ħdejn il-bieb tal-Knisja bħala għajnuna għar-riflessjoni fuq il-Kelma ta’ Alla fi djarna.

Nistiednu t-tfal u żgħażagħ jingħaqdu mal-kor li sa jkun iffurmat biex ikanta fil-festi tal-Milied. Biex ikun aktar faċli jieħdu sehem il-provi sa jsiru għal ftit ħin wara l-quddiesa tal-10.00am ta’ nhar ta’ Ħadd.

(Fil-quddiesa tal-10am tal-Ħadd: Niċċelebraw id-don tal-ħajja ta’ dawk li jagħlqu sninhom fix-xahar ta’ Novembru)

Il-Kummissjoni Festa sa torganizza Burger Delivery fl-20 ta’ Novembru 2021 b’risq il-Festa. Għandu jsir il-booking minn qabel mal-membri tal-Kummissjoni.

Avviżi – 31 ta’ Ottubru 2021

Fi tmiem il-ġimgħa ssir il-ġabra speċjali tax-xahar għall-bżonnijiet tal-Knisja u l-parroċċa. Nirringrazzjawkom tal-għajnuna ġeneruża tagħkom.

It-Tnejn 1 ta’ Novembru niċċelebraw il-Festa tal-Qaddisin kollha. Il-quddies ikun fil-5.30am u fis-6.15pm. Nistiednu lit-tfal biex fil-quddiesa tas-6.15pm iġibu magħhom stampa ta’ xi qaddis li jkunu jafu xi ħaġa żgħira fuq ħajtu biex flimkien insiru nafu aktar lill-qaddisin.

It-Tlieta 2 ta’ Novembru, it-Tifkira tal-Mejtin kollha, il-quddies fil-parroċċa tagħna jkun fil-5.30am, fis-7.00am u fis-6.15pm.

Il-Ġimgħa 5 ta’ Novembru hija l-ewwel Ġimgħa tax-xahar. Il-Knisja tkun miftuħa għat-talb fis-skiet bejn it-8.00 u l-11.00am.

Matul ix-xahar ta’ Novembru il-quddiesa tal-Ġimgħa filgħaxija tkun b’suffraġju għall-mejtin li tistgħu tħallu isimhom fuq il-formola li ssibu ħdejn il-bieb tal-Knisja. Fiċ-ċimiterju ssir quddiesa kull nhar ta’ Ġimgħa fil-11.30am.

Mis-Sibt 6 ta’ Novembru l-qrar qabel il-quddies tas-Sibt u l-Ħadd sa jerġa’ jibda jsir fuq wara tal-knisja. Hija ħaġa sabiħa li niċċelebraw ta’ sikwit dan is-sagrament li jerġa’ jħabbibna ma’ Alla.

Il-Ħadd 7 ta’ Novembru fl-4.00pm issir quddiesa fiċ-ċimiterju.

Mil-lum reġa’ beda jkun stampat il-fuljett Jum il-Mulej. Tistgħu tieħdu kopja minn ħdejn il-bieb tal-Knisja bħala għajnuna għar-riflessjoni fuq il-Kelma ta’ Alla fi djarna.

Nistiednu t-tfal jingħaqdu mal-kor li sa jkun iffurmat biex ikanta fil-festi tal-Milied. Biex ikun aktar faċli jieħdu sehem il-provi sa jsiru għal ftit ħin wara l-quddiesa tal-10.00am ta’ nhar ta’ Ħadd mis-7 ta’ Novembru 2021.

 

Avviżi – 26 ta’ Settembru 2021

It-Tnejn 27 ta’ Settembru l-quddiesa ta’ filgħaxija tibda tkun kuljum fis-6.15pm.

It-Tnejn 27 ta’ Settembru ssir il-laqgħa ġenerali annwali tal-Kummissjoni Festa fit-8pm. Dawk li jixtiequ jkunu f’din il-kummissjoni għandhom ikellmu lill-kappillan sal-lum.

Is-Sibt 2 u l-Ħadd 3 ta’ Ottubru sa niċċelebraw il-Festa ta’ San Franġisk ta’ Assisi fil-parroċċa tagħna. Is-Sibt fis-6.15pm issir it-tifkira tad-dħul ta’ San Franġisk fis-sema biċ-ċelebrazzjoni tat-Transtu u l-Quddiesa. Il-Ħadd 3 ta’ Ottubru fl-10am ssir quddiesa Solenni bis-sehem tat-tfal u l-familji tagħhom.