Avviżi – 26 ta’ Marzu 2023

Mil-lum il-quddiesa ta’ filgħaxija tibda tkun kuljum fis-7.00pm

 Nhar it-Tlieta 28 ta’ Marzu jkompli t-tieni kors ta’ eżerċizzi li sa jsir nhar ta’ Tlieta fit-8.00pm fid-Dar Parrokkjali u huwa miftuħ għal kulħadd.

 Nhar l-Erbgħa 29 ta’ Marzu jkompli l-ewwel kors ta’ eżerċizzi b’meditazzjoni fuq il-ħajja tan-nisrani. Dan il-kors qed isir kull nhar ta’ Erbgħa wara l-quddiesa ta’ filgħaxija.

Nhar il-Ħamis 30 ta’ Marzu fis-7.45pm sa jsir seminar bħala eżerċizzi tar-Randan għall-familja kollha. Ikun hemm riflessjoni mmexxija mis-sur Karl Vella, ħin għad-diskussjoni fi gruppi u wara nieklu xi ħaġa flimkien. It-tfal li jiġu flimkien mal-familja tagħhom sa jkollhom attività għalihom ukoll.

Nhar il-Ġimgħa 31 ta’ Marzu festa devozzjonali ta’ Marija Addolorata (Id-duluri). Il-quddies ikun fil-5.30am, f’nofsinhar u fis-7.00pm. Fit-7.45pm tibda purċissjoni bit-talba tar-rużarju li tgħaddi minn Triq Burmarrad, Triq Magħsar, Triq P. Wistin Magro, Triq San Pawl Miqli u Triq Burmarrad.

Nhar il-Ħadd 2 ta’ April nibdew il-Ġimgħa Mqaddsa b’Ħadd il-Palm. Din hi l-aktar ġimgħa importanti għalina l-insara għax fiha ngħixu flimkien il-passjoni, il-mewt u l-qawmien mill-imwiet ta’ Ġesù.

Il-quddiesa tal-10.00am tibda bit-tifkira tad-daħla ta’ Ġesù f’Ġerusalemm u t-tberik tal-friegħi taż-żebbuġ fil-ġnien tal-kunvent. Ninġabru fil-ġnien tal-kunvent fl-9.45am.

Biex nidħlu fil-ġrajja tal-Passjoni ta’ Ġesù inħeġġu li tinqara silta żgħira mir-rakkont tal-passjoni matul il-jiem li ġejjin. Dawn is-siltiet wieħed jista’ jsibhom fuq il-paġna ta’ FB tal-parroċċa.

Minn ħdejn il-bibien tal-Knisja tistgħu takkwistaw biljetti tal-lotterija b’rigali reliġjużi. Id-dħul jgħin biex jitħallsu l-ispejjeż tal-festi tal-Għid.

Sa ssir Ħarġa għal Għawdex l-għada tal-Għid. Tistgħu taraw il-programm online jew fuq in-notice boards. Biljetti mis-sagristija.

Xieraq li nsarrfu s-sawm tar-Randan f’karità lejn min hu fil-bżonn. Tistgħu tħallu oġġetti tal-ikel fil-qfief ħdejn in-niċċa ta’ Sant’Antnin għall-persuni fil-bżonn. Dak li jinġabar sa jingħata lill-Franciscan Welfare Association biex tqassmu skont il-ħtieġa.

Matul il-Ġimgħa Mqaddsa tkun meħtieġa l-għajnuna għal diversi xogħolijiet li jridu jsiru bi tħejjija għall-festi. Inħeġġu lil kulħadd biex jagħti sehemu mill-aħjar li jista’ biex, bħala komunità nisranija, nitħejjew għall-Għid flimkien anki fil-ħtiġijiet materjali. Dawk li jistgħu joffru ftit għajnuna jitkellmu mal-patrijiet.

 

Avviżi – 12 ta’ Marzu 2023

Nhar it-Tlieta 14 ta’ Marzu jibda t-tieni kors ta’ eżerċizzi li sa jsir nhar ta’ Tlieta fit-8.00pm fid-Dar Parrokkjali u huwa miftuħ għal kulħadd (minn 14-il sena ’l fuq).

 Nhar l-Erbgħa 15 ta’ Marzu jkompli l-ewwel kors ta’ eżerċizzi b’meditazzjoni fuq il-ħajja tan-nisrani. Dan il-kors qed isir kull nhar ta’ Erbgħa wara l-quddiesa ta’ filgħaxija.

Nhar il-Ħamis 16 ta’ Marzu fis-6.45pm issir Ċelebrazzjoni tal-Qima lill-Wiċċ ta’ Kristu.

Nhar il-Ġimgħa 17 ta’ Marzu sa ssir Via Sagra għat-tfal u l-ġenituri tagħhom fil-Knisja fil-5.00pm minflok il-laqgħa ta’ katekeżi.

F’għeluq l-għaxar snin tal-pontifikat tal-Papa Franġisk Mons. Arċisqof sa jmexxi quddiesa ta’ radd il-ħajr lil Alla nhar is-Sibt 18 ta’ Marzu fid-9.30am fil-Konkatidral ta’ San Ġwann. L-Arċisqof irid li minn kull parroċċa jkun hemm ħames persuni. Dawk li sa jmorru jħallu isimhom fis-sagristija.

Kull nhar ta’ Sibt fil-6.00pm niċċelebraw l-Għasar (it-talba ta’ filgħaxija tal-Knisja)

Nhar is-Sibt 25 ta’ Marzu t-tfal kollha huma mistiedna biex jieħdu sehem f’attività ta’ Prayer Spaces li sa ssir għall-parroċċa tagħna fl-iskola Santa Monika fil-Gżira fis-2.30pm. Nitolbu lill-ġenituri jgħidulna min ġej sa nhar il-Ħadd li ġej biex inkunu nistgħu norganizzaw it-trasport.

F’Ħamis ix-Xirka sa ssir mixgħela fuq iz-zuntier waqt il-ħin li jkun hemm l-Adorazzjoni fil-Knisja. Nistednukom tieħdu sehem f’din l-inizjattiva billi tixtru xemgħa mingħand l-abbatini minn fuq iz-zuntier wara l-quddies tal-lum.

Avviżi – 26 ta’ Frar 2023

Matul din il-ġimgħa nkomplu l-mixja tar-Randan. Nitolbu lil dawk li jistgħu jgħinu biex iqassmu l-fuljett bil-programm tar-Randan fid-djar mill-aktar fis. Dawk li ma joqgħodux f’Burmarrad jistgħu jieħdu kopja tal-programm minn ħdejn il-bibien tal-Knisja. Il-programm jinsab online ukoll.

Nhar l-Erbgħa 1 ta’ Marzu jkompli l-ewwel kors ta’ eżerċizzi b’meditazzjoni fuq il-ħajja tan-nisrani. Dan il-kors qed isir kull nhar ta’ Erbgħa wara l-quddiesa ta’ filgħaxija. Dawk li ma jistgħux jieħdu sehem fil-kors kollu huma mistiedna biex jiġu meta jistgħu.

Nhar il-Ħamis 2 ta’ Marzu fis-6.45pm issir iċ-ċelebrazzjoni tal-Corda Pia. Din hija devozzjoni Franġiskana ta’ qima lill-pjagi ta’ Ġesù u tifkira tal-pjagi ta’ San Franġisk u d-duluri ta’ Marija.

Nhar is-Sibt 4 ta’ Marzu sa jsir irtir spiritwali miftuħ għal kulħadd bejn id-9.00am u 12.30pm. Dan sa jsir fil-parroċċa tal-Manikata. Dawk li sa jattendu għandhom jinkitbu minn qabel minħabba li fl-aħħar ikun hemm xi ħaġa tal-ikel għal kulħadd.

Kull nhar ta’ Sibt filgħaxija fis-6.00pm ssir it-talba ta’ filgħaxija (l-Għasar) qabel il-quddiesa.